dard had se jo guzar jae chhalak jaunga

dard had se jo guzar jaa.e chhalak jā.ūñgā

ashk ban kar tirī āñkhoñ se Tapak jā.ūñgā

mirī āñkhoñ meñ to rahte haiñ sharāre phir bhī

ban ke angāra kisī roz dahak jā.ūñgā

pyaar se zahr bhī mil jaa.e to pī luuñ hañs kar

phuul nafrat se mileñge to sanak jā.ūñgā

vo bulandī hī kyā jo aañkh se ojhal kar de

itnī ūñchā.ī pe pahuñchūñ to bhaTak jā.ūñgā

jo mire dil ke añdheroñ ko nigal bhī na sake

un charāġhoñ ke ujāloñ se khisak jā.ūñgā

ye tamanna maiñ shab-o-roz liye phirtā huuñ

kaash tū mujh ko jo chhū le to mahak jā.ūñgā

maañd paḌ jā.egī 'irfān' tajallī sab kī

ban ke sūraj jo zamāne meñ damak jā.ūñgā

dard had se jo guzar jae chhalak jaunga

ashk ban kar teri aankhon se Tapak jaunga

meri aankhon mein to rahte hain sharare phir bhi

ban ke angara kisi roz dahak jaunga

pyar se zahr bhi mil jae to pi lun hans kar

phul nafrat se milenge to sanak jaunga

wo bulandi hi kya jo aankh se ojhal kar de

itni unchai pe pahunchun to bhaTak jaunga

jo mere dil ke andheron ko nigal bhi na sake

un charaghon ke ujalon se khisak jaunga

ye tamanna main shab-o-roz liye phirta hun

kash tu mujh ko jo chhu le to mahak jaunga

mand paD jaegi 'irfan' tajalli sab ki

ban ke suraj jo zamane mein damak jaunga