dard hai ki naghma hai faisla kiya jae

dard hai ki naġhma hai faisla kiyā jaa.e

ya.anī dil kī dhaḌkan par ġhaur kar liyā jaa.e

aap kitne saada haiñ chāhte haiñ bas itnā

zulm ke añdhere ko raat kah diyā jaa.e

aaj sab haiñ be-qīmat girya bhī tabassum bhī

dil meñ hañs liyā jaa.e dil meñ ro liyā jaa.e

be-hisī kī duniyā se do savāl mere bhī

kab talak jiyā jaa.e aur kyoñ jiyā jaa.e

ab to faqr-o-fāqa kī aabrū isī se hai

taar taar dāman ko kyoñ bhalā siyā jaa.e

dard hai ki naghma hai faisla kiya jae

yani dil ki dhaDkan par ghaur kar liya jae

aap kitne sada hain chahte hain bas itna

zulm ke andhere ko raat kah diya jae

aaj sab hain be-qimat girya bhi tabassum bhi

dil mein hans liya jae dil mein ro liya jae

be-hisi ki duniya se do sawal mere bhi

kab talak jiya jae aur kyon jiya jae

ab to faqr-o-faqa ki aabru isi se hai

tar tar daman ko kyon bhala siya jae