dard hai pattharon ke sinon mein

dard hai pattharoñ ke sīnoñ meñ

paḌ ga.e baal ābgīnoñ meñ

jeb vaale bhī kitne nādāñ haiñ

saañp rakhte haiñ āstīnoñ meñ

merī titlī-navāz fitrat ne

gul khilāyā hai nāznīnoñ meñ

āsmāñ marhamī sulūk kare

zaḳhm ugne lage zamīnoñ meñ

sho.ale bhaḌke haiñ ḳhuun barse haiñ

sabz barsāt ke mahīnoñ meñ

apnī pahchān ik pahelī thī

maiñ bhī shāmil thā be-yaqīnoñ meñ

chhoḌ jā.eñge tāliyoñ ke evaz

kuchh karishme tamāsh-bīnoñ meñ

jism saa.e meñ ḳhushk karne ko

muddatoñ tar hue pasīnoñ meñ

ḳhvāhishoñ kī baġhāvateñ mat pūchh

zindagī qaid hai mashīnoñ meñ

ghar meñ tīra-shabī kā mātam hai

maiñ daraḳhshāñ huuñ ham-nashīnoñ meñ

dard hai pattharon ke sinon mein

paD gae baal aabginon mein

jeb wale bhi kitne nadan hain

sanp rakhte hain aastinon mein

meri titli-nawaz fitrat ne

gul khilaya hai nazninon mein

aasman marhami suluk kare

zaKHm ugne lage zaminon mein

shoale bhaDke hain KHun barse hain

sabz barsat ke mahinon mein

apni pahchan ek paheli thi

main bhi shamil tha be-yaqinon mein

chhoD jaenge taliyon ke ewaz

kuchh karishme tamash-binon mein

jism sae mein KHushk karne ko

muddaton tar hue pasinon mein

KHwahishon ki baghawaten mat puchh

zindagi qaid hai mashinon mein

ghar mein tira-shabi ka matam hai

main daraKHshan hun ham-nashinon mein