dard se agar rishta dost ka nikal aae

dard se agar rishta dost kā nikal aa.e

ġham meñ muskurāne kā rāsta nikal aa.e

sach se ik ta.alluq hai har hasīn kāvish kā

har kahānī mumkin hai vāqi.a nikal aa.e

koThiyoñ meñ niklegā aadmī bhī mushkil se

jhoñpaḌoñ meñ mumkin hai devtā nikal aa.e

vaqt ne badal Daalā zindagī kī qadroñ ko

dost kyā the kal apne aaj kyā nikal aa.e

sochne agar baiTheñ un kī zulf-e-barham se

daar tak mohabbat kā silsila nikal aa.e

le chalā hai dil lekin baat jab hai bin TuuTe

pattharoñ kī bastī se aa.ina nikal aa.e

umr bhar mile jin se muskurā ke ham 'nazmī'

vo bhī dil ke zaḳhmoñ se āshnā nikal aa.e

dard se agar rishta dost ka nikal aae

gham mein muskurane ka rasta nikal aae

sach se ek talluq hai har hasin kawish ka

har kahani mumkin hai waqia nikal aae

koThiyon mein niklega aadmi bhi mushkil se

jhonpaDon mein mumkin hai dewta nikal aae

waqt ne badal Dala zindagi ki qadron ko

dost kya the kal apne aaj kya nikal aae

sochne agar baiThen un ki zulf-e-barham se

dar tak mohabbat ka silsila nikal aae

le chala hai dil lekin baat jab hai bin TuTe

pattharon ki basti se aaina nikal aae

umr bhar mile jin se muskura ke hum 'nazmi'

wo bhi dil ke zaKHmon se aashna nikal aae