dariya-e-mohabbat mein utar kar nahin aate

dariyā-e-mohabbat meñ utar kar nahīñ aate

lagtā hai unheñ 'ishq ke tevar nahīñ aate

jo log mire qad ke barābar nahīñ aate

vo log mire sāmne aksar nahīñ aate

kar dete haiñ vo lafzoñ se hī ḳhūn-e-tamannā

le kar vo kabhī haath meñ ḳhanjar nahīñ aate

kaliyoñ pe udāsī hai to phūloñ meñ hai ātish

gulshan meñ nazar pahle se manzar nahīñ aate

ye jurm-e-mohabbat kī sazā hai mujhe varna

qismat meñ mirī dard ke lashkar nahīñ aate

hāthoñ pe agar haath dhare baiThe rahoge

aise meñ natīje kabhī behtar nahīñ aate

ik baar hameñ dekh ke ruḳh pher liyā thā

ab un kī galī se bhī guzar kar nahīñ aate

takte the jharokhoñ se mirī raah kabhī jo

ab mere guzarne pe vo bāhar nahīñ aate

duniyā ko badal dene kā karte haiñ vo dā'vā

jo log gharoñ se kabhī bāhar nahīñ aate

vo pūchhte rahte haiñ mohabbat ke savālāt

ik ham haiñ ki ham se koī uttar nahīñ aate

ye daur hai taknīk kā is daur meñ 'sho.aib'

laḌne ke liye sāmne lashkar nahīñ aate

dariya-e-mohabbat mein utar kar nahin aate

lagta hai unhen 'ishq ke tewar nahin aate

jo log mere qad ke barabar nahin aate

wo log mere samne aksar nahin aate

kar dete hain wo lafzon se hi KHun-e-tamanna

le kar wo kabhi hath mein KHanjar nahin aate

kaliyon pe udasi hai to phulon mein hai aatish

gulshan mein nazar pahle se manzar nahin aate

ye jurm-e-mohabbat ki saza hai mujhe warna

qismat mein meri dard ke lashkar nahin aate

hathon pe agar hath dhare baiThe rahoge

aise mein natije kabhi behtar nahin aate

ek bar hamein dekh ke ruKH pher liya tha

ab un ki gali se bhi guzar kar nahin aate

takte the jharokhon se meri rah kabhi jo

ab mere guzarne pe wo bahar nahin aate

duniya ko badal dene ka karte hain wo da'wa

jo log gharon se kabhi bahar nahin aate

wo puchhte rahte hain mohabbat ke sawalat

ek hum hain ki hum se koi uttar nahin aate

ye daur hai taknik ka is daur mein 'shoaib'

laDne ke liye samne lashkar nahin aate