درمیاں خود اپنی ہستی ہو تو ہم بھی کیا کریں

درمیاں خود اپنی ہستی ہو تو ہم بھی کیا کریں

آئینہ دیکھیں کہ اپنے آپ سے پردا کریں

حال کے سیلاب میں تو بہہ گئی ماضی کی لاش

دفن اب کس کی گلی میں ہم غم فردا کریں

ایک دو پل ہی رہے گا سب کے چہروں کا طلسم

کوئی ایسا ہو کہ جس کو دیر تک دیکھا کریں

یہ تو سچ ہے زہر لگتے ہیں ہمیں بستی کے لوگ

کس توقع پر مگر آباد یہ صحرا کریں

سر پھرے سب جمع ہوں سب کے سروں پر ہو چراغ

بس چلے تو ہم بھی ایسا جشن اک برپا کریں