Darta hun arz-e-haal se dhoka na ho kahin

Dartā huuñ arz-e-hāl se dhokā na ho kahīñ

vo ruuTh jaa.eñ aur bhī aisā na ho kahīñ

kab tak talāsh dil kī karūñ aur kahāñ kahāñ

zulfoñ meñ dekh lījiye uljhā na ho kahīñ

qāsid mire makāñ kī taraf se gayā jo aaj

hotā hai shak mujhe ki bulāyā na ho kahīñ

ho jaa.e jal ke ḳhaak na ḳhud ye mirā vajūd

Dartā huuñ aah kā asar ulTā na ho kahīñ

dil le ke apne paas bulā.eñ vo kis liye

ye bhī to sochte haiñ taqāzā na ho kahīñ

ai shaiḳh terī baat kā kyā e'tibār ho

parde meñ is abā ke bhī duniyā na ho kahīñ

muddat huī ki dil ko qarār-o-sukūñ nahīñ

phirtā hai jaise is kā Thikānā na ho kahīñ

un kā marīz-e-ġham hai ka.ī din se jāñ-ba-lab

vo dil meñ sochte haiñ bahāna na ho kahīñ

kū-e-butāñ meñ terā guzar hai jo baar baar

ai dil tū aisī bātoñ se rusvā na ho kahīñ

'hāfiz' kī chashm-e-tar pe nazar chāhiye zarūr

ye tār-e-ashk dekhiye dariyā na ho kahīñ

Darta hun arz-e-haal se dhoka na ho kahin

wo ruTh jaen aur bhi aisa na ho kahin

kab tak talash dil ki karun aur kahan kahan

zulfon mein dekh lijiye uljha na ho kahin

qasid mere makan ki taraf se gaya jo aaj

hota hai shak mujhe ki bulaya na ho kahin

ho jae jal ke KHak na KHud ye mera wajud

Darta hun aah ka asar ulTa na ho kahin

dil le ke apne pas bulaen wo kis liye

ye bhi to sochte hain taqaza na ho kahin

ai shaiKH teri baat ka kya e'tibar ho

parde mein is aba ke bhi duniya na ho kahin

muddat hui ki dil ko qarar-o-sukun nahin

phirta hai jaise is ka Thikana na ho kahin

un ka mariz-e-gham hai kai din se jaan-ba-lab

wo dil mein sochte hain bahana na ho kahin

ku-e-butan mein tera guzar hai jo bar bar

ai dil tu aisi baaton se ruswa na ho kahin

'hafiz' ki chashm-e-tar pe nazar chahiye zarur

ye tar-e-ashk dekhiye dariya na ho kahin