darun-e-mai-kada kis darja hasrat-rez hai saqi

darūn-e-mai-kadā kis darja hasrat-rez hai saaqī

jo gard-ālūd kursī hai to TuuTī mez hai saaqī

na kyoñ hūr-e-jināñ ke zikr se mahzūz ho vaa.iz

ye us ke tausan-e-dil ke liye mahmez hai saaqī

mire auqāt-e-girya Time Table par muqarrar haiñ

ye banda ishq ke baare meñ bhī añgrez hai saaqī

jalā kar rakh diyā hai us ne shahr-e-ārzū merā

tirā darbān aslī vāris-e-chañgez hai saaqī

zarā is ūñghte mai-kash kī ik bharpūr chuTkī le

gulābī nāḳhun-e-tadbīr terā tez hai saaqī

vo mere do na.e paise hī apne purse meñ rakh le

ki us ke sabr kā paimāna ab labrez hai saaqī

raqīb-e-rū-siyah sar phoḌ legā kohkan ban kar

tirā shauhar ḳhudā ke fazl se parvez hai saaqī

mirā hissa mujhe chhup kar hī mil jaa.e to behtar hai

gadā-e-mai-kada ġhairoñ se kam-āmez hai saaqī

darun-e-mai-kada kis darja hasrat-rez hai saqi

jo gard-alud kursi hai to TuTi mez hai saqi

na kyon hur-e-jinan ke zikr se mahzuz ho waiz

ye us ke tausan-e-dil ke liye mahmez hai saqi

mere auqat-e-girya Time Table par muqarrar hain

ye banda ishq ke bare mein bhi angrez hai saqi

jala kar rakh diya hai us ne shahr-e-arzu mera

tera darban asli waris-e-changez hai saqi

zara is unghte mai-kash ki ek bharpur chuTki le

gulabi naKHun-e-tadbir tera tez hai saqi

wo mere do nae paise hi apne purse mein rakh le

ki us ke sabr ka paimana ab labrez hai saqi

raqib-e-ru-siyah sar phoD lega kohkan ban kar

tera shauhar KHuda ke fazl se parwez hai saqi

mera hissa mujhe chhup kar hi mil jae to behtar hai

gada-e-mai-kada ghairon se kam-amez hai saqi