dasht mein KHak uDane se kahan tak bachte

dasht meñ ḳhaak uḌāne se kahāñ tak bachte

ham tirā hijr manāne se kahāñ tak bachte

itne pur-lutf ishāre the tire lafzoñ meñ

ham tirī baat meñ aane se kahāñ tak bachte

jis se milte vo tijārat pe utar aatā thā

ḳhud ko bāzār banāne se kahāñ tak bachte

ham ne har jurm sar-e-bazm kiyā thā taslīm

log phir sang uThāne se kahāñ tak bachte

ham ko har taur zamāne se guzar karnā thā

ham bahar-hāl zamāne se kahāñ tak bachte

ham hī har baar hadaf ban ke chale aate the

tum bhī phir tiir chalāne se kahāñ tak bachte

ek din jaan gayā saarā zamāna jis ko

ḳhud ko vo baat batāne se kahāñ tak bachte

dasht mein KHak uDane se kahan tak bachte

hum tera hijr manane se kahan tak bachte

itne pur-lutf ishaare the tere lafzon mein

hum teri baat mein aane se kahan tak bachte

jis se milte wo tijarat pe utar aata tha

KHud ko bazar banane se kahan tak bachte

hum ne har jurm sar-e-bazm kiya tha taslim

log phir sang uThane se kahan tak bachte

hum ko har taur zamane se guzar karna tha

hum bahar-haal zamane se kahan tak bachte

hum hi har bar hadaf ban ke chale aate the

tum bhi phir tir chalane se kahan tak bachte

ek din jaan gaya sara zamana jis ko

KHud ko wo baat batane se kahan tak bachte