dasht mein lai hai ab azm-e-jawan mangti hai
dasht meñ laa.ī hai ab 'azm-e-javāñ māñgtī hai
merī vahshat tire qadmoñ ke nishāñ māñgtī hai
dil kī ḳhāmosh fazāoñ meñ uThī hai āvāz
koī ḳhvāhish hai jo ab izn-e-fuġhāñ māñgtī hai
din nikaltā hai to ḳhvāboñ kā pata pūchhtā hai
shaam aatī hai to aahoñ kā dhuāñ māñgtī hai
kitne asnām tarāshe haiñ ḳhudī ne lekin
aañkh kī hirs nayā shahr-e-butāñ māñgtī hai
jis ke dil par mirī bātoñ kā fusūñ taarī hai
vo to chup baiThī hai chāhat bhī kahāñ māñgtī hai
ek hasrat hai jo bātin meñ akelī bhaTke
ek hijrat hai jo ro ro ke makāñ māñgtī hai
mujh ko hālāt ne 'ahmad' jo kiyā hai majbūr
merī ḳhāmoshī bhī ab mujh se zabāñ māñgtī hai
dasht mein lai hai ab 'azm-e-jawan mangti hai
meri wahshat tere qadmon ke nishan mangti hai
dil ki KHamosh fazaon mein uThi hai aawaz
koi KHwahish hai jo ab izn-e-fughan mangti hai
din nikalta hai to KHwabon ka pata puchhta hai
sham aati hai to aahon ka dhuan mangti hai
kitne asnam tarashe hain KHudi ne lekin
aankh ki hirs naya shahr-e-butan mangti hai
jis ke dil par meri baaton ka fusun tari hai
wo to chup baiThi hai chahat bhi kahan mangti hai
ek hasrat hai jo baatin mein akeli bhaTke
ek hijrat hai jo ro ro ke makan mangti hai
mujh ko haalat ne 'ahmad' jo kiya hai majbur
meri KHamoshi bhi ab mujh se zaban mangti hai
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
