دشت میں لائی ہے اب عزم جواں مانگتی ہے

دشت میں لائی ہے اب عزم جواں مانگتی ہے

میری وحشت ترے قدموں کے نشاں مانگتی ہے

دل کی خاموش فضاؤں میں اٹھی ہے آواز

کوئی خواہش ہے جو اب اذن فغاں مانگتی ہے

دن نکلتا ہے تو خوابوں کا پتہ پوچھتا ہے

شام آتی ہے تو آہوں کا دھواں مانگتی ہے

کتنے اصنام تراشے ہیں خودی نے لیکن

آنکھ کی حرص نیا شہر بتاں مانگتی ہے

جس کے دل پر مری باتوں کا فسوں طاری ہے

وہ تو چپ بیٹھی ہے چاہت بھی کہاں مانگتی ہے

ایک حسرت ہے جو باطن میں اکیلی بھٹکے

ایک ہجرت ہے جو رو رو کے مکاں مانگتی ہے

مجھ کو حالات نے احمدؔ جو کیا ہے مجبور

میری خاموشی بھی اب مجھ سے زباں مانگتی ہے