دشت میں پیاسی بھٹک کر تشنگی مر جائے گی

دشت میں پیاسی بھٹک کر تشنگی مر جائے گی

یہ ہوا تو زیست کی امید بھی مر جائے گی

روک سکتے ہو تو روکو مذہبی تکرار کو

خون یوں بہتا رہا تو یہ صدی مر جائے گی

پھر اسی کوچے میں جانے کے لئے مچلا ہے دل

پھر اسی کوچے میں جا کر بے خودی مر جائے گی

بولنا بے حد ضروری ہے مگر یہ سوچ لو

چیخ جب ہوگی عیاں تو خامشی مر جائے گی

نفرتوں کی تیرگی پھیلی ہوئی ہے ہر طرف

پیار کے دیپک جلیں تو تیرگی مر جائے گی

رنج و غم سے رابطہ میرا نہ ٹوٹے اے خدا

یوں ہوا تو میری پوری شاعری مر جائے گی

دوستوں سے بے رخی اچھی نہیں ہوتی امنؔ

دوریاں زندہ رہیں تو دوستی مر جائے گی