dasht mein ye jaan-fazan manzar kahan se aa gae

dasht meñ ye jāñ-fazāñ manzar kahāñ se aa ga.e

is bayābāñ meñ chamakte ghar kahāñ se aa ga.e

qarya-e-jāñ meñ jhulastī dhuup thī chāroñ taraf

saayā le kar abr ke lashkar kahāñ se aa ga.e

vādī-e-taḳh.īl to be-rañg thī ik umar se

gum-shuda yādoñ ke ye paikar kahāñ se aa ga.e

Dhah chukī thiiñ jab tamannā.eñ sabhī khañDarāt meñ

shahr-e-dil meñ phir ye bām-o-dar kahāñ se aa ga.e

kis ne baḳhshī hai inheñ phir se uḌānoñ kī sakat

hausloñ ko phir se bāl-o-par kahāñ se aa ga.e

kal talak chhāyā huā thā mātam-e-be-chehragī

aaj nezoñ par achānak sar kahāñ se aa ga.e

dushmanoñ meñ the to ham par phuul kī bārish huī

dostoñ meñ haiñ to ye patthar kahāñ se aa ga.e

khā gayā thā jab samundar sīpiyāñ saarī 'ḳhumār'

phir tumhāre haath ye gauhar kahāñ se aa ga.e

dasht mein ye jaan-fazan manzar kahan se aa gae

is bayaban mein chamakte ghar kahan se aa gae

qarya-e-jaan mein jhulasti dhup thi chaaron taraf

saya le kar abr ke lashkar kahan se aa gae

wadi-e-taKHil to be-rang thi ek umar se

gum-shuda yaadon ke ye paikar kahan se aa gae

Dhah chuki thin jab tamannaen sabhi khanDaraat mein

shahr-e-dil mein phir ye baam-o-dar kahan se aa gae

kis ne baKHshi hai inhen phir se uDanon ki sakat

hauslon ko phir se baal-o-par kahan se aa gae

kal talak chhaya hua tha matam-e-be-chehragi

aaj nezon par achanak sar kahan se aa gae

dushmanon mein the to hum par phul ki barish hui

doston mein hain to ye patthar kahan se aa gae

kha gaya tha jab samundar sipiyan sari 'KHumar'

phir tumhaare hath ye gauhar kahan se aa gae