dekh ab apne hayule ko fana hote hue

dekh ab apne hayūle ko fanā hote hue

tū ne bandoñ se laḌā.ī kī ḳhudā hote hue

faisla honā hai jo kuchh aaj honā chāhiye

muddateñ lag jā.eñgī mahshar bapā hote hue

sochtā rahtā huuñ kab badlegī gulshan kī havā

dekhtā rahtā huuñ lamhoñ ko havā hote hue

hai balā ab kaun sī baaqī jo mujh par aa.egī

maiñ kisī se kyuuñ Darūñ be-dast-o-pā hote hue

dekhte rahte ho sab kuchh bolte kuchh bhī nahīñ

kis qadar bedard ho dard-āshnā hote hue

zard chehra surḳh āñkheñ kāñpte be-sabr hoñT

ye sabhī kuchh aur dil-e-be-mudda.ā hote hue

shādmāñ huuñ apnī sab majbūriyoñ ke bāvajūd

mutma.in huuñ ruuh ke andar ḳhalā hote hue

jin ko tū dhutkārtā hai vo bhī tere saa.e haiñ

tū ne itnā bhī nahīñ sochā ḳhafā hote hue

aaj kī tābindagī se kal kā andāza na kar

dekh pattoñ ko daraḳhtoñ se judā hote hue

muntazir huuñ kaun aatā hai koī vahshī ki chor

sun rahā huuñ phir se darvāze ko vā hote hue

dekh ab apne hayule ko fana hote hue

tu ne bandon se laDai ki KHuda hote hue

faisla hona hai jo kuchh aaj hona chahiye

muddaten lag jaengi mahshar bapa hote hue

sochta rahta hun kab badlegi gulshan ki hawa

dekhta rahta hun lamhon ko hawa hote hue

hai bala ab kaun si baqi jo mujh par aaegi

main kisi se kyun Darun be-dast-o-pa hote hue

dekhte rahte ho sab kuchh bolte kuchh bhi nahin

kis qadar bedard ho dard-ashna hote hue

zard chehra surKH aankhen kanpte be-sabr honT

ye sabhi kuchh aur dil-e-be-muddaa hote hue

shadman hun apni sab majburiyon ke bawajud

mutmain hun ruh ke andar KHala hote hue

jin ko tu dhutkarta hai wo bhi tere sae hain

tu ne itna bhi nahin socha KHafa hote hue

aaj ki tabindagi se kal ka andaza na kar

dekh patton ko daraKHton se juda hote hue

muntazir hun kaun aata hai koi wahshi ki chor

sun raha hun phir se darwaze ko wa hote hue