dekh kar dar-parda garm-e-daman-afshani mujhe

dekh kar dar-parda garm-e-dāman-afshānī mujhe

kar ga.ī vābasta-e-tan merī uryānī mujhe

ban gayā teġh-e-nigāh-e-yār kā sañg-e-fasāñ

marhabā maiñ kyā mubārak hai girāñ-jānī mujhe

kyuuñ na ho be-iltifātī us kī ḳhātir jam.a hai

jāntā hai mahv-e-pursish-hā-e-pinhānī mujhe

mere ġham-ḳhāne kī qismat jab raqam hone lagī

likh diyā min-jumla-e-asbāb-e-vīrānī mujhe

bad-gumāñ hotā hai vo kāfir na hotā kaash ke

is qadar zauq-e-navā-e-murġh-e-bustānī mujhe

vaa.e vaañ bhī shor-e-mahshar ne na dam lene diyā

le gayā thā gor meñ zauq-e-tan-āsānī mujhe

va.ada aane kā vafā kiije ye kyā andāz hai

tum ne kyuuñ sauñpī hai mere ghar kī darbānī mujhe

haañ nashāt-e-āmad-e-fasl-e-bahārī vaah vaah

phir huā hai taaza saudā-e-ġhazal-ḳhvānī mujhe

dī mire bhaa.ī ko haq ne az-sar-e-nau zindagī

mīrzā yūsuf hai 'ġhālib' yūsuf-e-sānī mujhe

dekh kar dar-parda garm-e-daman-afshani mujhe

kar gai wabasta-e-tan meri uryani mujhe

ban gaya tegh-e-nigah-e-yar ka sang-e-fasan

marhaba main kya mubarak hai giran-jaani mujhe

kyun na ho be-iltifati us ki KHatir jama hai

jaanta hai mahw-e-pursish-ha-e-pinhani mujhe

mere gham-KHane ki qismat jab raqam hone lagi

likh diya min-jumla-e-asbab-e-virani mujhe

bad-guman hota hai wo kafir na hota kash ke

is qadar zauq-e-nawa-e-murgh-e-bustani mujhe

wae wan bhi shor-e-mahshar ne na dam lene diya

le gaya tha gor mein zauq-e-tan-asani mujhe

wada aane ka wafa kije ye kya andaz hai

tum ne kyun saunpi hai mere ghar ki darbani mujhe

han nashat-e-amad-e-fasl-e-bahaari wah wah

phir hua hai taza sauda-e-ghazal-KHwani mujhe

di mere bhai ko haq ne az-sar-e-nau zindagi

mirza yusuf hai 'ghaalib' yusuf-e-sani mujhe