dekh kar KHud ko sanwarne ki ada tak le gaya

dekh kar ḳhud ko sañvarne kī adā tak le gayā

chain kyā vo mere dil kā aa.ina tak le gayā

mai-kashī kā shauq rind-e-pārsā tak le gayā

hosh merā aaj ik mard-e-ḳhudā tak le gayā

bārhā dhoke meñ aayā phir bhī ye maanā nahīñ

bā-vafā dil khīñch kar us bā-vafā tak le gayā

mil gayā dil kī badaulat ik surāġh-e-zindagī

ajnabī thā jo mujhe ik āshnā tak le gayā

qissa-go kā ye hunar thā aañkh nam hone na dī

hañste hañste ibtidā se intihā tak le gayā

ruuTh kar aise gayā phir lauT kar aayā nahīñ

zindagī meñ jo maza thā vo maza tak le gayā

ik parinda roz āñgan meñ chahaktā thā magar

chhīn kar ḳhush-fahmiyoñ kā zā.iqa tak le gayā

ho ke vo māyūs lauTā hal nahīñ niklā koī

mas.ala jo rahzanoñ kā rahnumā tak le gayā

kyā gayā vo chhoḌ kar bazm-e-mohabbat ai 'sahar'

talḳh-o-shīrīñ guftugū kā zā.iqa tak le gayā

dekh kar KHud ko sanwarne ki ada tak le gaya

chain kya wo mere dil ka aaina tak le gaya

mai-kashi ka shauq rind-e-parsa tak le gaya

hosh mera aaj ek mard-e-KHuda tak le gaya

barha dhoke mein aaya phir bhi ye mana nahin

ba-wafa dil khinch kar us ba-wafa tak le gaya

mil gaya dil ki badaulat ek suragh-e-zindagi

ajnabi tha jo mujhe ek aashna tak le gaya

qissa-go ka ye hunar tha aankh nam hone na di

hanste hanste ibtida se intiha tak le gaya

ruTh kar aise gaya phir lauT kar aaya nahin

zindagi mein jo maza tha wo maza tak le gaya

ek parinda roz aangan mein chahakta tha magar

chhin kar KHush-fahmiyon ka zaiqa tak le gaya

ho ke wo mayus lauTa hal nahin nikla koi

masala jo rahzanon ka rahnuma tak le gaya

kya gaya wo chhoD kar bazm-e-mohabbat ai 'sahar'

talKH-o-shirin guftugu ka zaiqa tak le gaya