دیکھ کر خود کو سنورنے کی ادا تک لے گیا

دیکھ کر خود کو سنورنے کی ادا تک لے گیا

چین کیا وہ میرے دل کا آئنہ تک لے گیا

مے کشی کا شوق رند پارسا تک لے گیا

ہوش میرا آج اک مرد خدا تک لے گیا

بارہا دھوکے میں آیا پھر بھی یہ مانا نہیں

با وفا دل کھینچ کر اس باوفا تک لے گیا

مل گیا دل کی بدولت اک سراغ زندگی

اجنبی تھا جو مجھے اک آشنا تک لے گیا

قصہ گو کا یہ ہنر تھا آنکھ نم ہونے نہ دی

ہنستے ہنستے ابتدا سے انتہا تک لے گیا

روٹھ کر ایسے گیا پھر لوٹ کر آیا نہیں

زندگی میں جو مزہ تھا وہ مزہ تک لے گیا

اک پرندہ روز آنگن میں چہکتا تھا مگر

چھین کر خوش فہمیوں کا ذائقہ تک لے گیا

ہو کے وہ مایوس لوٹا حل نہیں نکلا کوئی

مسئلہ جو رہزنوں کا رہنما تک لے گیا

کیا گیا وہ چھوڑ کر بزم محبت اے سحرؔ

تلخ و شیریں گفتگو کا ذائقہ تک لے گیا