dekh o qatil basar karte hain kis mushkil se hum

dekh o qātil basar karte haiñ kis mushkil se ham

chāragar se dard-e-nālāñ dard se dil dil se ham

haa.e kyā be-ḳhud kiyā hai ġhaflat-e-ummīd ne

hāl-e-dil kahte haiñ apnā phir usī qātil se ham

rashk aa'dā ne kiye raushan badan meñ ustuḳhvāñ

sham'-e-mahfil ho ke uTThe aap kī mahfil se ham

is ko kahte haiñ vafādārī ki ba.ad-az-qatl bhī

dāġh-e-ḳhūñ ho kar na chhūTe dāman-e-qātil se ham

tuul thī rāh-e-adam ghabrā ke so.e qabr meñ

paañv phailā.e thake jab dūrī-e-manzil se ham

jism-e-raushan se nazar aate haiñ jalve ruuh ke

husn-e-lailā dekhte haiñ parda-e-mahmil se ham

ḳhālī az ehsāñ nahīñ ye bhī ki vaqt-e-iztirāb

ḳhush to ho jaate haiñ tere vāda-e-bātil se ham

aao aapas meñ samajh leñ ġhair kaahe ko sune

tum kaho dil se hamāre kuchh tumhāre dil se ham

sun ke ro dete haiñ aksar sūrat-e-zaḳhm-e-jigar

aap sharmāte haiñ apne ḳhanda-e-bātil se ham

rashk hai hasrat pe us kī dil meñ aatā hai yahī

apne qālib ko badal leñ qālib-e-bismil se ham

sīna-e-dil meñ hujūm-e-dāġh-e-hasrat hai 'nasīm'

phuul chun lete haiñ apne gulshan-e-hāsil se ham

dekh o qatil basar karte hain kis mushkil se hum

chaaragar se dard-e-nalan dard se dil dil se hum

hae kya be-KHud kiya hai ghaflat-e-ummid ne

haal-e-dil kahte hain apna phir usi qatil se hum

rashk aa'da ne kiye raushan badan mein ustuKHwan

sham'-e-mahfil ho ke uTThe aap ki mahfil se hum

is ko kahte hain wafadari ki baad-az-qatl bhi

dagh-e-KHun ho kar na chhuTe daman-e-qatil se hum

tul thi rah-e-adam ghabra ke soe qabr mein

panw phailae thake jab duri-e-manzil se hum

jism-e-raushan se nazar aate hain jalwe ruh ke

husn-e-laila dekhte hain parda-e-mahmil se hum

KHali az ehsan nahin ye bhi ki waqt-e-iztirab

KHush to ho jate hain tere wada-e-baatil se hum

aao aapas mein samajh len ghair kahe ko sune

tum kaho dil se hamare kuchh tumhaare dil se hum

sun ke ro dete hain aksar surat-e-zaKHm-e-jigar

aap sharmate hain apne KHanda-e-baatil se hum

rashk hai hasrat pe us ki dil mein aata hai yahi

apne qalib ko badal len qalib-e-bismil se hum

sina-e-dil mein hujum-e-dagh-e-hasrat hai 'nasim'

phul chun lete hain apne gulshan-e-hasil se hum