dekhiye aa ke zara ek ishaara kar ke

dekhiye aa ke zarā ek ishāra kar ke

rakh diyā aap ne kyā haal hamārā kar ke

de diyā dil hī unheñ un kā bharam rakhne ko

lutf aatā hai hameñ apnā ḳhasārā kar ke

aap chāheñ ki na aa.eñ to idhar ġham bhī nahīñ

ham to jī lete haiñ yādoñ ko sahārā kar ke

zindagī talḳh huī jaatī hai itnī ki na pūchh

bas guzar jaa.e kisī tarh guzārā kar ke

is tarah duur mujhe maañ nahīñ hone detī

mujh ko nazroñ meñ vo rakhtī hai sitāra kar ke

rāsta koī bachā hī nahīñ marne ke sivā

ham na jī pā.eñge rusvā.ī gavārā kar ke

ham se ik pal bhī na ho pā.egā 'ḳhālid' kaise

log maañ baap se rahte haiñ kinārā kar ke

dekhiye aa ke zara ek ishaara kar ke

rakh diya aap ne kya haal hamara kar ke

de diya dil hi unhen un ka bharam rakhne ko

lutf aata hai hamein apna KHasara kar ke

aap chahen ki na aaen to idhar gham bhi nahin

hum to ji lete hain yaadon ko sahaara kar ke

zindagi talKH hui jati hai itni ki na puchh

bas guzar jae kisi tarh guzara kar ke

is tarah dur mujhe man nahin hone deti

mujh ko nazron mein wo rakhti hai sitara kar ke

rasta koi bacha hi nahin marne ke siwa

hum na ji paenge ruswai gawara kar ke

hum se ek pal bhi na ho paega 'KHalid' kaise

log man bap se rahte hain kinara kar ke