dekhne wali jagah thi dekhne ka kaam tha

dekhne vaalī jagah thī dekhne kā kaam thā

sochtā huuñ mere jaisoñ kā vahāñ kyā kaam thā

maslahat thī yā thī majbūrī koī jaane ḳhudā

tham ga.e haiñ log vo bhī jin ko bahnā kaam thā

tum bhī jaane kaise kaise kaam karne lag ga.e

zindagī meñ aadmī ko ek ronā kaam thā

dam-ba-dam ham ko bhī ik vahshat ne rakkhā mubtalā

jis tarah farhād ko tesha-ba-tesha kaam thā

ik galī meñ ghūmte rahte the sārā-sārā din

kyā zamāna thā hameñ bhī kaisā-kaisā kaam thā

yuuñ hī phailāyā huā thā kārobār-e-ārzū

dar-haqīqat aadmī ko ik zarā sā kaam thā

manzileñ fursat kī mutaqāzī thiiñ aur ham tez-gām

jin ko 'sānī' 'umr-bhar rasta-ba-rasta kaam thā

dekhne wali jagah thi dekhne ka kaam tha

sochta hun mere jaison ka wahan kya kaam tha

maslahat thi ya thi majburi koi jaane KHuda

tham gae hain log wo bhi jin ko bahna kaam tha

tum bhi jaane kaise kaise kaam karne lag gae

zindagi mein aadmi ko ek rona kaam tha

dam-ba-dam hum ko bhi ek wahshat ne rakkha mubtala

jis tarah farhad ko tesha-ba-tesha kaam tha

ek gali mein ghumte rahte the sara-sara din

kya zamana tha hamein bhi kaisa-kaisa kaam tha

yun hi phailaya hua tha karobar-e-arzu

dar-haqiqat aadmi ko ek zara sa kaam tha

manzilen fursat ki mutaqazi thin aur hum tez-gam

jin ko 'sani' 'umr-bhar rasta-ba-rasta kaam tha