dekho to jaan tum kun manate hain kab seti

dekho to jaan tum kuuñ manāte haiñ kab setī

bolo ḳhudā ke vāste Tuk laal lab setī

mukhḌā tirā hai jaan ye achraj tirā kā chāñd

rozāna aur ḳhuub jhalaktā hai shab setī

zulfāñ kuuñ kah ki dil kuuñ kareñ aap meñ siiñ duur

ye pech-o-tāb un kuuñ hai us ke ta.ab setī

dast-e-salām sar ke upar naqsh-e-pā hai ab

har-chand ḳhāk-e-rāh huā huuñ adab setī

paanī meñ Duub aag meñ jal kar maro pe ek

āshiq na ho pukār ke kahtā huuñ sab setī

harjā.iyo har ek siiñ lālach nahīñ hai ḳhuub

hai bhiik maañg khānā bhalā is kasab setī

bāñdhā hai barg-e-tāk kā kyuuñ sar pe sehra

kiyā 'ābrū' kā byaah hai bint-ul-enab setī

dekho to jaan tum kun manate hain kab seti

bolo KHuda ke waste Tuk lal lab seti

mukhDa tera hai jaan ye achraj tera ka chand

rozana aur KHub jhalakta hai shab seti

zulfan kun kah ki dil kun karen aap mein sin dur

ye pech-o-tab un kun hai us ke tab seti

dast-e-salam sar ke upar naqsh-e-pa hai ab

har-chand KHak-e-rah hua hun adab seti

pani mein Dub aag mein jal kar maro pe ek

aashiq na ho pukar ke kahta hun sab seti

harjaiyo har ek sin lalach nahin hai KHub

hai bhik mang khana bhala is kasab seti

bandha hai barg-e-tak ka kyun sar pe sehra

kiya 'abru' ka byah hai bint-ul-enab seti