dekhte hain raqs mein din raat paimane ko hum

dekhte haiñ raqs meñ din raat paimāne ko ham

sāqiyā raas aa ga.e haiñ tere mai-ḳhāne ko ham

le ke apne saath ik ḳhāmosh dīvāne ko ham

jā rahe haiñ hazrat-e-nāseh ko samjhāne ko ham

yaad rakkheñge tumhārī bazm meñ aane ko ham

baiThne ke vāste aġhyār uTh jaane ko ham

husn majbūr-e-sitam hai ishq majbūr-e-vafā

sham.a ko samjhā.eñ yā samjhā.eñ parvāne ko ham

rakh ke tinke Dar rahe haiñ kyā kahegā bāġhbāñ

dekhte haiñ āshiyāñ kī shāḳh jhuk jaane ko ham

uljhaneñ tūl-e-shab-e-furqat kī aage aa ga.iiñ

jab kabhī baiThe kisī kī zulf suljhāne ko ham

rāste meñ raat ko muDbheḌ saaqī kuchh na pūchh

muḌ rahe the shaiḳh-jī masjid ko but-ḳhāne ko ham

shaiḳh-jī hotā hai apnā kaam apne haath se

apnī masjid ko sambhāleñ aap but-ḳhāne ko ham

do ghaḌī ke vāste taklīf ġhairoñ ko na de

ḳhud hī baiThe haiñ tirī mahfil se uTh jaane ko ham

aap qātil se masīhā ban ga.e achchhā huā

varna apnī zindagī samjhe the mar jaane ko ham

sun ke shikva hashr meñ kahte ho sharmāte nahīñ

tum sitam karte phiro duniyā pe sharmāne ko ham

ai 'qamar' Dar tū ye hai aġhyār dekheñge unheñ

chāñdnī shab meñ bulā laa.eñ bulā laane ko ham

dekhte hain raqs mein din raat paimane ko hum

saqiya ras aa gae hain tere mai-KHane ko hum

le ke apne sath ek KHamosh diwane ko hum

ja rahe hain hazrat-e-naseh ko samjhane ko hum

yaad rakkhenge tumhaari bazm mein aane ko hum

baiThne ke waste aghyar uTh jaane ko hum

husn majbur-e-sitam hai ishq majbur-e-wafa

shama ko samjhaen ya samjhaen parwane ko hum

rakh ke tinke Dar rahe hain kya kahega baghban

dekhte hain aashiyan ki shaKH jhuk jaane ko hum

uljhanen tul-e-shab-e-furqat ki aage aa gain

jab kabhi baiThe kisi ki zulf suljhane ko hum

raste mein raat ko muDbheD saqi kuchh na puchh

muD rahe the shaiKH-ji masjid ko but-KHane ko hum

shaiKH-ji hota hai apna kaam apne hath se

apni masjid ko sambhaalen aap but-KHane ko hum

do ghaDi ke waste taklif ghairon ko na de

KHud hi baiThe hain teri mahfil se uTh jaane ko hum

aap qatil se masiha ban gae achchha hua

warna apni zindagi samjhe the mar jaane ko hum

sun ke shikwa hashr mein kahte ho sharmate nahin

tum sitam karte phiro duniya pe sharmane ko hum

ai 'qamar' Dar tu ye hai aghyar dekhenge unhen

chandni shab mein bula laen bula lane ko hum