der se jaane kahan khoya hua hai tu bhi

der se jaane kahāñ khoyā huā hai tū bhī

yuuñ lage merī tarah soch rahā hai tū bhī

be-ishāra to nahīñ chāk-e-garebāñ merā

merī vahshat meñ mire saath rahā hai tū bhī

maiñ huuñ ehsās ke tā’mīr-shuda zindāñ meñ

kuchh ḳhalāoñ meñ magar DhūñD rahā hai tū bhī

apnā lahja mirī ġhazloñ meñ samone vaale

merī āvāz meñ ḳhud naġhma-sarā hai tū bhī

koī dhuñdlī sī bhī tasvīr nahīñ āñkhoñ meñ

jaise TuuTā huā paimān-e-vafā hai tū bhī

dil dhaḌaktā hai to har shab ye gumāñ hotā hai

maiñ to soyā hī nahīñ jaag rahā hai tū bhī

ham 'sirāj' aas meñ jalte haiñ havā kī zad par

raat añdherī hī sahī aa to rahā hai tū bhī

der se jaane kahan khoya hua hai tu bhi

yun lage meri tarah soch raha hai tu bhi

be-ishaara to nahin chaak-e-gareban mera

meri wahshat mein mere sath raha hai tu bhi

main hun ehsas ke ta’mir-shuda zindan mein

kuchh KHalaon mein magar DhunD raha hai tu bhi

apna lahja meri ghazlon mein samone wale

meri aawaz mein KHud naghma-sara hai tu bhi

koi dhundli si bhi taswir nahin aankhon mein

jaise TuTa hua paiman-e-wafa hai tu bhi

dil dhaDakta hai to har shab ye guman hota hai

main to soya hi nahin jag raha hai tu bhi

hum 'siraj' aas mein jalte hain hawa ki zad par

raat andheri hi sahi aa to raha hai tu bhi