Dhate hain ab wo zulm-o-sitam kam bahut hi kam

Dhāte haiñ ab vo zulm-o-sitam kam bahut hī kam

yā'nī hai un kā lutf-o-karam kam bahut hī kam

jis raah meñ haiñ ranj-o-alam kam bahut hī kam

uThte haiñ us pe mere qadam kam bahut hī kam

is se murād ye to nahīñ dil hai mutma.in

maanā hai merī aañkh meñ nam kam bahut hī kam

ai dost aur hai tirā dil aur hī zabāñ

ab tujh ko muñh lagā.eñge ham kam bahut hī kam

fard-e-gunāh dekh ke yārab sazā na de

niyyat mirī hai is meñ raqam kam bahut hī kam

haq-go kī baat baat ko iz.hār-e-haq samajh

khaa.e agar ḳhudā kī qasam kam bahut hī kam

rindoñ ke dam se shaiḳh huā chāñd 'iid kā

aatā hai va.az karne ko kam kam bahut hī kam

ab fāqa-mastiyoñ se ye 'ādat sī ho ga.ī

khātā huuñ rizq kī bhī qasam kam bahut hī kam

saaqī kī chashm-e-mast kī hai baat hī kuchh aur

hai us ke aage bāda-e-jam kam bahut hī kam

ai qais agar zamīn-e-ġhazal ho na sañglāḳh

chaltā hai us meñ pā-e-qalam kam bahut hī kam

Dhate hain ab wo zulm-o-sitam kam bahut hi kam

ya'ni hai un ka lutf-o-karam kam bahut hi kam

jis rah mein hain ranj-o-alam kam bahut hi kam

uThte hain us pe mere qadam kam bahut hi kam

is se murad ye to nahin dil hai mutmain

mana hai meri aankh mein nam kam bahut hi kam

ai dost aur hai tera dil aur hi zaban

ab tujh ko munh lagaenge hum kam bahut hi kam

fard-e-gunah dekh ke yarab saza na de

niyyat meri hai is mein raqam kam bahut hi kam

haq-go ki baat baat ko izhaar-e-haq samajh

khae agar KHuda ki qasam kam bahut hi kam

rindon ke dam se shaiKH hua chand 'id ka

aata hai waz karne ko kam kam bahut hi kam

ab faqa-mastiyon se ye 'adat si ho gai

khata hun rizq ki bhi qasam kam bahut hi kam

saqi ki chashm-e-mast ki hai baat hi kuchh aur

hai us ke aage baada-e-jam kam bahut hi kam

ai qais agar zamin-e-ghazal ho na sanglaKH

chalta hai us mein pa-e-qalam kam bahut hi kam