Dhal chuki sham ghar ab lauT ke jaya jae

Dhal chukī shaam ghar ab lauT ke jaayā jaa.e

ā.īna ḳhud ko haqīqat kā dikhāyā jaa.e

hai abhī sub.h kabhī shaam bhī hogī us kī

chaḌhte sūraj ko utarnā bhī sikhāyā jaa.e

kyuuñ sitāre hī hoñ haqdār falak ke har dam

ḳhvāb zarre ko bhī azmat kā dikhāyā jaa.e

ek muddat se muqaddar mirā hai rūThā huā

tarz-e-kāvish se chalo us ko manāyā jaa.e

ik shajar soch rahā dhuup meñ tanhā sā khaḌā

kaise is shahr ko jalne se bachāyā jaa.e

is se pahle kī charāġhoñ se sajā.eñ mahfil

ek muflis kā bujhā chūlhā jalāyā jaa.e

Dhal chuki sham ghar ab lauT ke jaya jae

aaina KHud ko haqiqat ka dikhaya jae

hai abhi subh kabhi sham bhi hogi us ki

chaDhte suraj ko utarna bhi sikhaya jae

kyun sitare hi hon haqdar falak ke har dam

KHwab zarre ko bhi azmat ka dikhaya jae

ek muddat se muqaddar mera hai ruTha hua

tarz-e-kawish se chalo us ko manaya jae

ek shajar soch raha dhup mein tanha sa khaDa

kaise is shahr ko jalne se bachaya jae

is se pahle ki charaghon se sajaen mahfil

ek muflis ka bujha chulha jalaya jae