dhanak gulab ghazal sa mujhe mila ek shaKHs

dhanak gulāb ġhazal sā mujhe milā ik shaḳhs

gale lage na lage dil ko lag gayā ik shaḳhs

hamārī zindagī qaa.em hai chhe 'anāsir par

charāġh phuul mohabbat du'ā vafā ik shaḳhs

'arab qabīle kī ḳhush-rang tū samajh na sakī

nikāh ke liye raazī bhī tujh se thā ik shaḳhs

hamesha ham ne bichā.ī haiñ dhaḌkaneñ rah meñ

hamesha ham se rahā hai gurez-pā ik shaḳhs

maiñ apne aap se hone lagā huuñ duur huzūr

mire vujūd meñ aise samā gayā ik shaḳhs

nahīñ du'ā ki zamāna ho saarā saath magar

bas ek shaḳhs 'atā ho mire ḳhudā ik shaḳhs

bichhaḌ ke us se maiñ ḳhud meñ simaT ke baiTh gayā

phir ek 'umr mujhe DhūñDhtā rahā ik shaḳhs

maiñ apne 'aks ke dhoke meñ mar gayā 'shahbāz'

maiñ aa.ina thā mujhe aa.ina lagā ik shaḳhs

dhanak gulab ghazal sa mujhe mila ek shaKHs

gale lage na lage dil ko lag gaya ek shaKHs

hamari zindagi qaem hai chhe 'anasir par

charagh phul mohabbat du'a wafa ek shaKHs

'arab qabile ki KHush-rang tu samajh na saki

nikah ke liye raazi bhi tujh se tha ek shaKHs

hamesha hum ne bichai hain dhaDkanen rah mein

hamesha hum se raha hai gurez-pa ek shaKHs

main apne aap se hone laga hun dur huzur

mere wujud mein aise sama gaya ek shaKHs

nahin du'a ki zamana ho sara sath magar

bas ek shaKHs 'ata ho mere KHuda ek shaKHs

bichhaD ke us se main KHud mein simaT ke baiTh gaya

phir ek 'umr mujhe DhunDhta raha ek shaKHs

main apne 'aks ke dhoke mein mar gaya 'shahbaz'

main aaina tha mujhe aaina laga ek shaKHs