dhire dhire jise is dil mein basaya maine

dhīre dhīre jise is dil meñ basāyā maiñ ne

us kī ḳhushbū ko zamāne se churāyā maiñ ne

sochtī huuñ ki zamāne ke havāle kar duuñ

muddatoñ se jise duniyā se chhupāyā maiñ ne

ek āvāz pe dauḌā huā aa jā.egā

mujh ko mā'lūm thā phir bhī na bulāyā maiñ ne

chāñd tāroñ se jo āñchal ko sajā detā thā

dil-e-nādāñ use kitnā hī rulāyā maiñ ne

ye mohabbat hai jo har dard ko sah letī hai

apnī hastī ko bhī is raah pe laayā maiñ ne

'umr bhar us ke liye dard sahā kuchh na kahā

us ke jazbāt ko palkoñ pe uThāyā maiñ ne

merī tanhā.ī ne māñgī thī du'ā.eñ 'asmā'

phir charāġh-e-ġham-e-hijrāñ ko jalāyā maiñ ne

dhire dhire jise is dil mein basaya main ne

us ki KHushbu ko zamane se churaya main ne

sochti hun ki zamane ke hawale kar dun

muddaton se jise duniya se chhupaya main ne

ek aawaz pe dauDa hua aa jaega

mujh ko ma'lum tha phir bhi na bulaya main ne

chand taron se jo aanchal ko saja deta tha

dil-e-nadan use kitna hi rulaya main ne

ye mohabbat hai jo har dard ko sah leti hai

apni hasti ko bhi is rah pe laya main ne

'umr bhar us ke liye dard saha kuchh na kaha

us ke jazbaat ko palkon pe uThaya main ne

meri tanhai ne mangi thi du'aen 'asma'

phir charagh-e-gham-e-hijran ko jalaya main ne