دھواں گر اٹھتا ہے دل سے کہ جاں سے اٹھنے دو

دھواں گر اٹھتا ہے دل سے کہ جاں سے اٹھنے دو

مجھے نہ روکو حسینو جہاں سے اٹھنے دو

کسی کی خاک کف پا ہے کائنات مری

ستارو چھوڑو مجھے آسماں سے اٹھنے دو

تم اپنے سر پہ یہ الزام کیوں اٹھاتے ہو

وفا کا مدعا میری زباں سے اٹھنے دو

تمہارے جانے کی تدبیر بھی نکالوں گا

چراغ بجھتے ہوئے آشیاں سے اٹھنے دو

چٹان غم کی جو دل پر رکھی ہے صدیوں سے

کبھی تو درد کے آب رواں سے اٹھنے دو

میرے کفن میں بھی اک داغ تم لگا دینا

مری یہ لاش مگر آستاں سے اٹھنے دو

تمہارے تیر کو مل جائے گی جگہ کوئی

بس ایک آہ دل مہرباں سے اٹھنے دو

کہاں کا چاند کیا سورج کہاں کے سیارے

مجھے فریب کی اس کہکشاں سے اٹھنے دو

ندیمؔ وصل کی صورت نکال ہی لے گا

بدن کو پہلے ذرا درمیاں سے اٹھنے دو