dhundli samton mein agar kunj ka par mil jae

dhuñdlī samtoñ meñ agar kuuñj kā par mil jaa.e

phir to ai dar-badarī mujh ko bhī ghar mil jaa.e

aur hī rang meñ ho barg-o-samar kā honā

jis kī ḳhvāhish hai mujhe vo bhī agar mil jaa.e

muntazir jis kā huuñ vo aa.e zarūrī to nahīñ

ye bhī mumkin hai koī aur ḳhabar mil jaa.e

ḳhāk-o-ḳhvāb ek hī thailī ke haiñ chaTTe-baTTe

dil kī marzī hai jidhar chāhe udhar mil jaa.e

ehtimām aisā ho fursat ke dinoñ meñ dil kā

ek Dar ḳhatm ho aur dūsrā Dar mil jaa.e

is tarah se na guzārūñgā yaqīnan tujh ko

zindagī tū jo mujhe bār-e-digar mil jaa.e

dhundli samton mein agar kunj ka par mil jae

phir to ai dar-badari mujh ko bhi ghar mil jae

aur hi rang mein ho barg-o-samar ka hona

jis ki KHwahish hai mujhe wo bhi agar mil jae

muntazir jis ka hun wo aae zaruri to nahin

ye bhi mumkin hai koi aur KHabar mil jae

KHak-o-KHwab ek hi thaili ke hain chaTTe-baTTe

dil ki marzi hai jidhar chahe udhar mil jae

ehtimam aisa ho fursat ke dinon mein dil ka

ek Dar KHatm ho aur dusra Dar mil jae

is tarah se na guzarunga yaqinan tujh ko

zindagi tu jo mujhe bar-e-digar mil jae