دھندلی سمتوں میں اگر کونج کا پر مل جائے

دھندلی سمتوں میں اگر کونج کا پر مل جائے

پھر تو اے در بدری مجھ کو بھی گھر مل جائے

اور ہی رنگ میں ہو برگ و ثمر کا ہونا

جس کی خواہش ہے مجھے وہ بھی اگر مل جائے

منتظر جس کا ہوں وہ آئے ضروری تو نہیں

یہ بھی ممکن ہے کوئی اور خبر مل جائے

خاک و خواب ایک ہی تھیلی کے ہیں چٹے بٹے

دل کی مرضی ہے جدھر چاہے ادھر مل جائے

اہتمام ایسا ہو فرصت کے دنوں میں دل کا

ایک ڈر ختم ہو اور دوسرا ڈر مل جائے

اس طرح سے نہ گزاروں گا یقینا تجھ کو

زندگی تو ۔۔۔جو مجھے بار دگر مل جائے