diwane ki baaten sun kar chaunk paDe farzane log

dīvāne kī bāteñ sun kar chauñk paḌe farzāne log

muddat meñ pahchāne lekin phir bhī kyā pahchāne log

roz-o-shab talḳhāba-e-hastī shām-o-sahar ḳhūnāba-e-ġham

amrit kah kar pī lete haiñ zahr-bhare paimāne log

dil kā ye vīrān khañDar phir shahr-e-tarab ban jā.egā

kitne sundar sapne dekhā karte haiñ dīvāne log

ab vo aañkh kahāñ hai jis par hotī thī taḳhlīq ġhazal

ḳhvāb huiiñ vo bāteñ jin par likhte the afsāne log

vo bachpan ke sangī-sāthī vo bhī fasurda ham bhī udaas

yuuñ milte haiñ rasta chalte jaise hoñ begāne log

ek nazar māhaul pe Dāleñ 'māhir' ham phir ġhaur kareñ

muddat se sanjīda kyoñ haiñ āḳhir ye dīvāne log

diwane ki baaten sun kar chaunk paDe farzane log

muddat mein pahchane lekin phir bhi kya pahchane log

roz-o-shab talKHaba-e-hasti sham-o-sahar KHunaba-e-gham

amrit kah kar pi lete hain zahr-bhare paimane log

dil ka ye viran khanDar phir shahr-e-tarab ban jaega

kitne sundar sapne dekha karte hain diwane log

ab wo aankh kahan hai jis par hoti thi taKHliq ghazal

KHwab huin wo baaten jin par likhte the afsane log

wo bachpan ke sangi-sathi wo bhi fasurda hum bhi udas

yun milte hain rasta chalte jaise hon begane log

ek nazar mahaul pe Dalen 'mahir' hum phir ghaur karen

muddat se sanjida kyon hain aaKHir ye diwane log