diwar-e-KHwab mein koi dar kar nahin sake

dīvār-e-ḳhvāb meñ koī dar kar nahīñ sake

ham log shab se aage safar kar nahīñ sake

ik shaam ke chale hue pahuñche miyān-e-shab

bhaTke kuchh is tarah ki sahar kar nahīñ sake

shāyad abhī rihā.ī nahīñ chāhte the ham

so us ko apnī koī ḳhabar kar nahīñ sake

ham kār-e-zindagī kī tarah kār-e-'āshiqī

karnā to chāhte the magar kar nahīñ sake

āñkhoñ pe kis ke ḳhvāb kā parda paḌā rahā

ham chaah kar bhī ḳhud pe nazar kar nahīñ sake

tum se bhī pahle kitnoñ ne khaa.ī yahāñ shikast

duniyā ko fat.h tum bhī agar kar nahīñ sake

diwar-e-KHwab mein koi dar kar nahin sake

hum log shab se aage safar kar nahin sake

ek sham ke chale hue pahunche miyan-e-shab

bhaTke kuchh is tarah ki sahar kar nahin sake

shayad abhi rihai nahin chahte the hum

so us ko apni koi KHabar kar nahin sake

hum kar-e-zindagi ki tarah kar-e-'ashiqi

karna to chahte the magar kar nahin sake

aankhon pe kis ke KHwab ka parda paDa raha

hum chah kar bhi KHud pe nazar kar nahin sake

tum se bhi pahle kitnon ne khai yahan shikast

duniya ko fath tum bhi agar kar nahin sake