دیوار تکلف ہے تو مسمار کرو نا

دیوار تکلف ہے تو مسمار کرو نا

گر اس سے محبت ہے تو اظہار کرو نا

ممکن ہے تمہارے لئے ہو جاؤں میں آساں

تم خود کو مرے واسطے دشوار کرو نا

گر یاد کرو گے تو چلا آؤں گا اک دن

تم دل کی گزر گاہ کو ہموار کرو نا

باہر کے محاذوں کی تمہیں فتح مبارک

اب نفس کے شیطاں کو گرفتار کرو نا

کہنا ہے اگر کچھ تو پس و پیش کرو مت

کھل کے کبھی جذبات کا اظہار کرو نا

ہر رشتۂ جاں توڑ کے آیا ہوں یہاں تک

تم بھی مری خاطر کوئی ایثار کرو نا

اعجازؔ تمہارے لئے ساحل پہ کھڑا ہوں

دریائے وفا میرے لئے پار کرو نا