dikhai de na kabhi ye to mumkinat mein hai

dikhā.ī de na kabhī ye to mumkināt meñ hai

vo sab vujūd meñ hai jo tasavvurāt meñ hai

maiñ jis hunar se huuñ poshīda apnī ġhazloñ meñ

usī tarah vo chhupā saarī kā.enāt meñ hai

ki jaise jism kī rag rag meñ dauḌtā hai lahū

isī tarah vo ravāñ arsa-e-hayāt meñ hai

ki jaise sang ke siine meñ koī but hai nihāñ

usī tarah koī sūrat taḳhayyulāt meñ hai

ki jaise vaqt guzarne kā kuchh na ho ehsās

usī tarah vo sharīk-e-safar hayāt meñ hai

ki jaise bū-e-vafā ḳhud-supurdagī meñ mile

usī tarah kī mahak us kī iltifāt meñ hai

ki jaise jhuuT ka.ī jhuuT ke sahāre le

usī tarah vo pareshāñ takallufāt meñ hai

gunāh bhī koī jaise kare Dare bhī bahut

usī tarah kī jhijhak us kī baat baat meñ hai

bas ab to 'ishq hai hijr-o-visāl kuchh bhī nahīñ

ye TukḌā ziist kā din meñ hai aur na raat meñ hai

nazar ke zāviye badle hai aur kuchh bhī nahīñ

vahī hai kā'be meñ jo 'nūr' somnāth meñ hai

dikhai de na kabhi ye to mumkinat mein hai

wo sab wujud mein hai jo tasawwuraat mein hai

main jis hunar se hun poshida apni ghazlon mein

usi tarah wo chhupa sari kaenat mein hai

ki jaise jism ki rag rag mein dauDta hai lahu

isi tarah wo rawan arsa-e-hayat mein hai

ki jaise sang ke sine mein koi but hai nihan

usi tarah koi surat taKHayyulat mein hai

ki jaise waqt guzarne ka kuchh na ho ehsas

usi tarah wo sharik-e-safar hayat mein hai

ki jaise bu-e-wafa KHud-supurdagi mein mile

usi tarah ki mahak us ki iltifat mein hai

ki jaise jhuT kai jhuT ke sahaare le

usi tarah wo pareshan takallufat mein hai

gunah bhi koi jaise kare Dare bhi bahut

usi tarah ki jhijhak us ki baat baat mein hai

bas ab to 'ishq hai hijr-o-visal kuchh bhi nahin

ye TukDa zist ka din mein hai aur na raat mein hai

nazar ke zawiye badle hai aur kuchh bhi nahin

wahi hai ka'be mein jo 'nur' somnath mein hai