dil aur mere KHun ka dauran ghazal hai

dil aur mire ḳhuun kā daurān ġhazal hai

har saañs tavāzun hai ki mīzān ġhazal hai

mujh pe haiñ ka.ī aur 'ināyāt bhī lekin

ilhām ke mālik tirā ehsān ġhazal hai

is vaqt mujhe raqs kī tarġhīb milī hai

is vaqt mire vajd kā imkān ġhazal hai

Tapkegā lahū lafz koī chiir ke dekho

tum log samajhte ho ki be-jān ġhazal hai

hai josh magar dil meñ talātum hai bahut kam

is bahr meñ simTā huā tūfān ġhazal hai

maiñ 'ishq meñ rāhat ke tasavvur se huuñ vāqif

bechain mirā dil hai mirā dhyān ġhazal hai

vaise to ka.ī aur ta'āruf bhī haiñ 'āsim'

har bazm-e-suḳhan meñ mirī pahchān ġhazal hai

dil aur mere KHun ka dauran ghazal hai

har sans tawazun hai ki mizan ghazal hai

mujh pe hain kai aur 'inayat bhi lekin

ilham ke malik tera ehsan ghazal hai

is waqt mujhe raqs ki targhib mili hai

is waqt mere wajd ka imkan ghazal hai

Tapkega lahu lafz koi chir ke dekho

tum log samajhte ho ki be-jaan ghazal hai

hai josh magar dil mein talatum hai bahut kam

is bahr mein simTa hua tufan ghazal hai

main 'ishq mein rahat ke tasawwur se hun waqif

bechain mera dil hai mera dhyan ghazal hai

waise to kai aur ta'aruf bhi hain 'asim'

har bazm-e-suKHan mein meri pahchan ghazal hai