دل اور مرے خون کا دوران غزل ہے

دل اور مرے خون کا دوران غزل ہے

ہر سانس توازن ہے کہ میزان غزل ہے

مجھ پہ ہیں کئی اور عنایات بھی لیکن

الہام کے مالک ترا احسان غزل ہے

اس وقت مجھے رقص کی ترغیب ملی ہے

اس وقت مرے وجد کا امکان غزل ہے

ٹپکے گا لہو لفظ کوئی چیر کے دیکھو

تم لوگ سمجھتے ہو کہ بے جان غزل ہے

ہے جوش مگر دل میں تلاطم ہے بہت کم

اس بحر میں سمٹا ہوا طوفان غزل ہے

میں عشق میں راحت کے تصور سے ہوں واقف

بے چین مرا دل ہے مرا دھیان غزل ہے

ویسے تو کئی اور تعارف بھی ہیں عاصمؔ

ہر بزم سخن میں مری پہچان غزل ہے