dil bech ke jo humne mohabbat KHarid li

dil bech ke jo ham ne mohabbat ḳharīd lī

ab sochte haiñ kyā ye musībat ḳharīd lī

ai 'ishq jab se rakkhā tire dasht meñ qadam

'izzat gañvā.ī aur malāmat ḳharīd lī

sab yaad tujh ko karte haiñ majnūñ ke naam se

ai qais tū ne kaisī ye shohrat ḳharīd lī

badle meñ ek daane ke jannat ko chhoḌ kar

duniyā kī chaar din kī sukūnat ḳharīd lī

un kī tapish ne aur bhī jhulsā ke rakh diyā

jab ham ne qurbatoñ kī burūdat ḳharīd lī

din meñ hai koī kaam na hai raat koī kaam

kar kar ke chāplūsiyāñ fursat ḳharīd lī

iqlīm-e-vaqt ko to na ham fat.h kar sake

furqat kī ulTā ham ne hazīmat ḳharīd lī

dil bech ke jo hum ne mohabbat KHarid li

ab sochte hain kya ye musibat KHarid li

ai 'ishq jab se rakkha tere dasht mein qadam

'izzat ganwai aur malamat KHarid li

sab yaad tujh ko karte hain majnun ke nam se

ai qais tu ne kaisi ye shohrat KHarid li

badle mein ek dane ke jannat ko chhoD kar

duniya ki chaar din ki sukunat KHarid li

un ki tapish ne aur bhi jhulsa ke rakh diya

jab hum ne qurbaton ki burudat KHarid li

din mein hai koi kaam na hai raat koi kaam

kar kar ke chaplusiyan fursat KHarid li

iqlim-e-waqt ko to na hum fath kar sake

furqat ki ulTa hum ne hazimat KHarid li