dil gali mein teri ja kar bhi pareshan tha kya

dil galī meñ tirī jā kar bhī pareshān thā kyā

us se aage kahīñ jaane kā bhī imkān thā kyā

ham ko aanā thā galī meñ tirī so aa ga.e ham

ahl-e-duniyā se hamārā koī paimān thā kyā

faqr kī mujh se zamāne ko tavaqqo' thī fuzūl

maiñ shikam-banda koī būzar-o-salmān thā kyā

bujh ga.e saare diye bād-e-havādis se jahāñ

maiñ na bujhtā to charāġh-e-tah-e-dāmāñ thā kyā

ham to muflis the magar ahl-e-havas ke liye bhī

qad-o-gesū ke 'alāva sar-o-sāmān thā kyā

kyā 'ajab tum meñ jo karte rahe ġhārat-garī log

kishvar-e-tan kā tumhārā koī sultān thā kyā

kār-e-ulfat meñ bhī qaa.il haiñ musāvāt ke ham

us ne ham se jo nibhāyā to kuchh ehsān thā kyā

vo to kahiye ki vo aa hī gayā kal shab varna

lailatul-qadr kā milnā koī āsān thā kyā

tū jo kahtā hī rahā husn ko kāfir 'najmī'

sach batā 'ishq tirā sāhib-e-īmān thā kyā

dil gali mein teri ja kar bhi pareshan tha kya

us se aage kahin jaane ka bhi imkan tha kya

hum ko aana tha gali mein teri so aa gae hum

ahl-e-duniya se hamara koi paiman tha kya

faqr ki mujh se zamane ko tawaqqo' thi fuzul

main shikam-banda koi buzar-o-salman tha kya

bujh gae sare diye baad-e-hawadis se jahan

main na bujhta to charagh-e-tah-e-daman tha kya

hum to muflis the magar ahl-e-hawas ke liye bhi

qad-o-gesu ke 'alawa sar-o-saman tha kya

kya 'ajab tum mein jo karte rahe ghaarat-gari log

kishwar-e-tan ka tumhaara koi sultan tha kya

kar-e-ulfat mein bhi qail hain musawat ke hum

us ne hum se jo nibhaya to kuchh ehsan tha kya

wo to kahiye ki wo aa hi gaya kal shab warna

lailatul-qadr ka milna koi aasan tha kya

tu jo kahta hi raha husn ko kafir 'najmi'

sach bata 'ishq tera sahib-e-iman tha kya