dil hai mamur tere gham ki nigahbani par

dil hai māmūr tire ġham kī nigahbānī par

koī mushkil na paḌe ab mirī āsānī par

maiñ idhar likhtā udhar miTtā chalā jaatā thā

phir bhī kuchh soch ke maiñ likhtā rahā paanī par

ab vo manzar hī kahāñ jo mujhe hairān kare

maiñ to hairān huuñ bas aap kī hairānī par

in lakīroñ meñ to ahvāl chhupā hai merā

ye lakīreñ jo paḌī haiñ mirī peshānī par

dasht se bhāgā huā raat kā huuñ jaagā huā

tabsira kyā karūñ is shahr kī vīrānī par

rāsta vo hai ki ḳhud apnā bhī chalnā mushkil

shukr kartā huuñ maiñ is be-sar-o-sāmānī par

jab talak aañkh meñ aañsū the maiñ royā 'ġhā.er'

ab to jī khol ke hañstā huuñ pareshānī par

dil hai mamur tere gham ki nigahbani par

koi mushkil na paDe ab meri aasani par

main idhar likhta udhar miTta chala jata tha

phir bhi kuchh soch ke main likhta raha pani par

ab wo manzar hi kahan jo mujhe hairan kare

main to hairan hun bas aap ki hairani par

in lakiron mein to ahwal chhupa hai mera

ye lakiren jo paDi hain meri peshani par

dasht se bhaga hua raat ka hun jaga hua

tabsira kya karun is shahr ki virani par

rasta wo hai ki KHud apna bhi chalna mushkil

shukr karta hun main is be-sar-o-samani par

jab talak aankh mein aansu the main roya 'ghaer'

ab to ji khol ke hansta hun pareshani par