دل ہے مامور ترے غم کی نگہبانی پر

دل ہے مامور ترے غم کی نگہبانی پر

کوئی مشکل نہ پڑے اب مری آسانی پر

میں ادھر لکھتا ادھر مٹتا چلا جاتا تھا

پھر بھی کچھ سوچ کے میں لکھتا رہا پانی پر

اب وہ منظر ہی کہاں جو مجھے حیران کرے

میں تو حیران ہوں بس آپ کی حیرانی پر

ان لکیروں میں تو احوال چھپا ہے میرا

یہ لکیریں جو پڑی ہیں مری پیشانی پر

دشت سے بھاگا ہوا رات کا ہوں جاگا ہوا

تبصرہ کیا کروں اس شہر کی ویرانی پر

راستہ وہ ہے کہ خود اپنا بھی چلنا مشکل

شکر کرتا ہوں میں اس بے سروسامانی پر

جب تلک آنکھ میں آنسو تھے میں رویا غائرؔ

اب تو جی کھول کے ہنستا ہوں پریشانی پر