دل ہے مسرت غم جاناں لئے ہوئے

دل ہے مسرت غم جاناں لئے ہوئے

لیکن ملال تلخیٔ دوراں لئے ہوئے

اے دل نہ ہو اداس خدارا نہ ہو اداس

احساس تشنہ کامیٔ ارماں لئے ہوئے

ہر مشکل حیات ہے خود اپنی آڑ میں

آسانیٔ حیات کا ساماں لئے ہوئے

ہر کم نظر کو دے کے زمانے کی راحتیں

میں خوش ہوں اپنا قلب پریشاں لئے ہوئے

اے رہروان ساحل امید ہوشیار

ساحل ہے اپنی گود میں طوفاں لئے ہوئے

اے دوست اپنے آپ پہ نازاں رہا ہوں میں

اک عزم سر بلندیٔ انساں لئے ہوئے

امید التفات پہ بیٹھا ہوں مطمئن

سرمایۂ ندامت عصیاں لئے ہوئے

اس انجمن میں جا تو رہا ہوں مگر عتیقؔ

دل میں کشاکش غم دوراں لئے ہوئے