dil hi bujha hua hai to lutf-e-bahaar kya

dil hī bujhā huā hai to lutf-e-bahār kyā

saaqī hai kyā sharāb hai kyā sabza-zār kyā

ye dil kī tāzgī hai vo dil kī fasurdagī

is gulshan-e-jahāñ kī ḳhizāñ kyā bahār kyā

jis kī qafas meñ aañkh khulī ho mirī tarah

us ke liye chaman kī ḳhizāñ kyā bahār kyā

bād-e-fanā fuzūl hai nām-o-nishāñ kī fikr

jab ham nahīñ rahe to rahegā mazār kyā

ā'māl kā tilism hai nairang-e-rozgār

taqdīr kyā hai gardish-e-lail-o-nahār kyā

tafsīr-e-hāl-e-zār hai bas ik nigāh-e-yās

ho dāstān-e-dard kā aur iḳhtisār kyā

chhiTkī huī hai gor-e-ġharībāñ pe chāñdnī

hai bekasoñ ko fikr-e-charāġh-e-mazār kyā

dil hi bujha hua hai to lutf-e-bahaar kya

saqi hai kya sharab hai kya sabza-zar kya

ye dil ki tazgi hai wo dil ki fasurdagi

is gulshan-e-jahan ki KHizan kya bahaar kya

jis ki qafas mein aankh khuli ho meri tarah

us ke liye chaman ki KHizan kya bahaar kya

baad-e-fana fuzul hai nam-o-nishan ki fikr

jab hum nahin rahe to rahega mazar kya

aa'mal ka tilism hai nairang-e-rozgar

taqdir kya hai gardish-e-lail-o-nahaar kya

tafsir-e-haal-e-zar hai bas ek nigah-e-yas

ho dastan-e-dard ka aur iKHtisar kya

chhiTki hui hai gor-e-ghariban pe chandni

hai bekason ko fikr-e-charagh-e-mazar kya