dil ishq mein bechain bas apna hi nahin hai

dil 'ishq meñ bechain bas apnā hī nahīñ hai

is rah meñ sukūñ dosto miltā hī nahīñ hai

ham laa.eñ misāl us kī to laa.eñ bhī kahāñ se

us jaisā hasīñ ham ne to dekhā hī nahīñ hai

bigḌe na na.ī nasl bhalā kaise batāo

jab tum ne ġhalat raah se rokā hī nahīñ hai

ham dost use apnā banā.eñ bhī to kaise

ġhairoñ kā vo kyā hogā jo apnā hī nahīñ hai

rozī ke liye kyoñ na bhaTakte phireñ bachche

kyā kaam kareñ haath meñ paisa hī nahīñ hai

duniyā meñ kareñ kis se ab ummīd hayā kī

jab sharm-o-hayā kā kahīñ pardā hī nahīñ hai

rotā hai jahāñ merī tabāhī pe abhī tak

aur aap ye kahte haiñ ki charchā hī nahīñ hai

jo aap kī marzī hai kiye jaao vahī kaam

maiñ ne to kabhī aap ko rokā hī nahīñ hai

ḳhud-ġharz huā itnā 'sho.eb' aaj kā insāñ

jaise ki kisī se koī rishta hī nahīñ hai

dil 'ishq mein bechain bas apna hi nahin hai

is rah mein sukun dosto milta hi nahin hai

hum laen misal us ki to laen bhi kahan se

us jaisa hasin hum ne to dekha hi nahin hai

bigDe na nai nasl bhala kaise batao

jab tum ne ghalat rah se roka hi nahin hai

hum dost use apna banaen bhi to kaise

ghairon ka wo kya hoga jo apna hi nahin hai

rozi ke liye kyon na bhaTakte phiren bachche

kya kaam karen hath mein paisa hi nahin hai

duniya mein karen kis se ab ummid haya ki

jab sharm-o-haya ka kahin parda hi nahin hai

rota hai jahan meri tabahi pe abhi tak

aur aap ye kahte hain ki charcha hi nahin hai

jo aap ki marzi hai kiye jao wahi kaam

main ne to kabhi aap ko roka hi nahin hai

KHud-gharz hua itna 'shoeb' aaj ka insan

jaise ki kisi se koi rishta hi nahin hai