dil jahan hai agar wahan na rahe

dil jahāñ hai agar vahāñ na rahe

phir na jaane kahāñ kahāñ na rahe

ghar rahe aur sā.ebāñ na rahe

aisā hotā to hai jo maañ na rahe

lauT jaane ko jī nahīñ chāhe

duniyā aisī to mezbāñ na rahe

ham bhī jab mehrbāñ kisī pe nahīñ

koī bhī ham pe mehrbāñ na rahe

fāsla hī baḌhā liyā itnā

kaise ab koī darmiyāñ na rahe

kaun pursān-e-hāl hai apnā

dil ko ummīd-e-rā.egāñ na rahe

ġhair ke sā.ebāñ meñ jā.egā

apne ghar meñ agar amaañ na rahe

baat jab hai 'sabā' ho auj-e-kamāl

choT deñ yuuñ zarā nishāñ na rahe

dil jahan hai agar wahan na rahe

phir na jaane kahan kahan na rahe

ghar rahe aur saeban na rahe

aisa hota to hai jo man na rahe

lauT jaane ko ji nahin chahe

duniya aisi to mezban na rahe

hum bhi jab mehrban kisi pe nahin

koi bhi hum pe mehrban na rahe

fasla hi baDha liya itna

kaise ab koi darmiyan na rahe

kaun pursan-e-haal hai apna

dil ko ummid-e-raegan na rahe

ghair ke saeban mein jaega

apne ghar mein agar aman na rahe

baat jab hai 'saba' ho auj-e-kamal

choT den yun zara nishan na rahe