dil-jhil mein phenka hai teri yaad ne patthar

dil-jhīl meñ pheñkā hai tirī yaad ne patthar

sar se na guzar jaa.e koī mauj ubhar kar

ye phuul se ruḳh sarv se qad chāñd se paikar

halchal sī machā dete haiñ jazbāt ke andar

kuchh aur sitam aur sitam ai ġham-e-daurāñ

khulte haiñ baḌī der meñ insān ke jauhar

tū paas bhī itnā ki tujhe dekh na pā.ūñ

tū duur bhī itnā ki mirī soch se bāhar

maiñ kaun sī manzil ke liye garm-e-safar huuñ

chaltā nahīñ koī bhī mire naqsh-e-qadam par

ik tū ki tirā ek hī rishta hai jahāñ meñ

ik maiñ ki mire saiñkaḌoñ rishte haiñ zamīñ par

insāñ kā safar sū-e-qamar ḳhuub hai lekin

fitne na uThā.e ye kahīñ chāñd meñ jā kar

ai sub.h-e-tarab aa mirī āñkhoñ meñ samā jā

maġhmūm na kar jaa.eñ tujhe shaam ke manzar

kab tak vo kirā.e ke makānoñ meñ raheñge

'nusrat' jo banā sakte nahīñ apne liye ghar

dil-jhil mein phenka hai teri yaad ne patthar

sar se na guzar jae koi mauj ubhar kar

ye phul se ruKH sarw se qad chand se paikar

halchal si macha dete hain jazbaat ke andar

kuchh aur sitam aur sitam ai gham-e-dauran

khulte hain baDi der mein insan ke jauhar

tu pas bhi itna ki tujhe dekh na paun

tu dur bhi itna ki meri soch se bahar

main kaun si manzil ke liye garm-e-safar hun

chalta nahin koi bhi mere naqsh-e-qadam par

ek tu ki tera ek hi rishta hai jahan mein

ek main ki mere sainkaDon rishte hain zamin par

insan ka safar su-e-qamar KHub hai lekin

fitne na uThae ye kahin chand mein ja kar

ai subh-e-tarab aa meri aankhon mein sama ja

maghmum na kar jaen tujhe sham ke manzar

kab tak wo kirae ke makanon mein rahenge

'nusrat' jo bana sakte nahin apne liye ghar