dil jo surat-gar-e-mani ka sanam-KHana bane

dil jo sūrat-gar-e-ma.anī kā sanam-ḳhāna bane

aañkh jis shai pa paḌe jalva-e-jānāna bane

utne hī ho ga.e ham manzil-e-irfāñ ke qarīb

jis qadar rasm-o-rah-e-dahr se begāna bane

tā-dar-e-yār pahuñchtā hai vo ḳhud-rafta-e-shauq

apnī hastī se jo is raah meñ begāna bane

zarf-e-mai TuuT ke bhī hone na paa.e bekār

ho shikasta koī shīsha to vo paimāna bane

sa.i-e-nākām se maiñ haath uThā.ūñgā na 'barq'

merī bigḌī huī taqdīr bane yā na bane

dil jo surat-gar-e-mani ka sanam-KHana bane

aankh jis shai pa paDe jalwa-e-jaanana bane

utne hi ho gae hum manzil-e-irfan ke qarib

jis qadar rasm-o-rah-e-dahr se begana bane

ta-dar-e-yar pahunchta hai wo KHud-rafta-e-shauq

apni hasti se jo is rah mein begana bane

zarf-e-mai TuT ke bhi hone na pae bekar

ho shikasta koi shisha to wo paimana bane

sai-e-nakaam se main hath uThaunga na 'barq'

meri bigDi hui taqdir bane ya na bane