دل کا حق یوں ادا کرے کوئی

دل کا حق یوں ادا کرے کوئی

درد بن کر رہا کرے کوئی

درد میں کچھ کمی سی لگتی ہے

زخم پھر سے ہرا کرے کوئی

پہلے رکھ لے وہ جاں ہتھیلی پر

پھر محبت کیا کرے کوئی

حسن کی خود سپردگی کے لئے

عشق کی انتہا کرے کوئی

مجھ کو اللہ پر بھروسہ ہے

ہو جو دشمن ہوا کرے کوئی

جانے کیا کیا یہ کہتا رہتا ہے

کیسے دل کا کہا کرے کوئی

جب وفاؤں کی کوئی قدر نہیں

کیوں کسی سے وفا کرے کوئی

چھین لیں جو کسی کی بینائی

ان اجالوں کا کیا کرے کوئی

رخ ہواؤں کا دیکھ لے پہلے

جب بھی روشن دیا کرے کوئی

رکھے ملحوظ حق بیانی کو

شاعری جب کیا کرے کوئی

سب یہاں اجنبی سے ہیں فاروقؔ

کس کو اپنا کہا کرے کوئی