دل کہتا ہے دیکھوں گا ترا تیر نظر توڑ

دل کہتا ہے دیکھوں گا ترا تیر نظر توڑ

جس طرح مجھے توڑا ہے اس طرح جگر توڑ

قاتل تجھے جب حال مرے دل کا کھلے گا

اک تیر سے پہلے مرے سینے کی سپر توڑ

وہ آئے ہیں جی بھر کے انہیں دیکھ لے تو بھی

اشکوں کا ذرا تار تو اے دیدۂ تر توڑ

سرسبز تو ہونے دے ذرا نخل تمنا

ناداں ہے ابھی خام نہ الفت کا ثمر توڑ

بے کار مجھے دیکھتا ہے ترچھی نظر سے

تیر نگہ یار مرا قلب و جگر توڑ

پہلے سے اذاں دینے پہ توڑی گئی منقار

دم وصل کی شب آج تو اے مرغ سحر توڑ

سمجھوں گا شفیقؔ اپنا میں تیر نگہ یار

گر ایک اشارے میں مرا قلب و جگر توڑ