دل کے بے ترتیب ویرانے کو گھر اس نے کیا

دل کے بے ترتیب ویرانے کو گھر اس نے کیا

پھر نظام زندگی زیر و زبر اس نے کیا

آس کے روشن دیے رکھ کر فصیل شام پر

رات کے اندھے سفر کو بے خطر اس نے کیا

ایک اس کے دم سے ہر موسم ہوا رشک بہار

ایک شاخ آرزو کو بے ثمر اس نے کیا

ان کہے لفظوں کو بخشا اک نیا طرز کلام

ان بہے اشکوں کو پھر لعل و گہر اس نے کیا

بے قراری تھی جسے سننے سنانے کے لئے

حرف شوق بے کراں کو مختصر اس نے کیا

خواب میں ملنا تو گویا روز کا معمول تھا

اس انوکھے کھیل کو یوں معتبر اس نے کیا

عمر بھر جس کو نگاہیں ڈھونڈھتی پھرتی رہیں

عمر بھر میرے خیالوں میں بسر اس نے کیا

کر رہا تھا وہ بھی تارے توڑ کر لانے کی بات

بے سبب لمحوں کا جادو بے اثر اس نے کیا

کہکشاں پھرتی رہی گلیوں میں کس کو ڈھونڈھتی

لوگ کہتے ہیں مرے گھر تک سفر اس نے کیا