dil ke har zaKHm ko palkon pe sajaya to gaya

dil ke har zaḳhm ko palkoñ pe sajāyā to gayā

aap ke naam pe ik jashn manāyā to gayā

mai-e-kohna na sahī ḳhūn-e-tamannā hī sahī

ek paimāna mire sāmne laayā to gayā

ḳhair apnā nahīñ bāġhī hī samajh kar ham ko

terī mahfil meñ kisī taur bulāyā to gayā

ab ye baat aur ki zindāñ meñ bhī zanjīreñ haiñ

ham ko gulshan kī balāoñ se bachāyā to gayā

daar pe chaḌh ke bhī ḳhush haiñ ki hameñ is dil meñ

is bahāne hī sahī apnā banāyā to gayā

ab ye qismat hī na jaage to kare kyā koī

roz-o-shab ik nayā tūfān uThāyā to gayā

kyā hai manzil se agar ho ga.e ham duur 'aḳhtar'

rahbaroñ ke hameñ halqe se nikālā to gayā

dil ke har zaKHm ko palkon pe sajaya to gaya

aap ke nam pe ek jashn manaya to gaya

mai-e-kohna na sahi KHun-e-tamanna hi sahi

ek paimana mere samne laya to gaya

KHair apna nahin baghi hi samajh kar hum ko

teri mahfil mein kisi taur bulaya to gaya

ab ye baat aur ki zindan mein bhi zanjiren hain

hum ko gulshan ki balaon se bachaya to gaya

dar pe chaDh ke bhi KHush hain ki hamein is dil mein

is bahane hi sahi apna banaya to gaya

ab ye qismat hi na jage to kare kya koi

roz-o-shab ek naya tufan uThaya to gaya

kya hai manzil se agar ho gae hum dur 'aKHtar'

rahbaron ke hamein halqe se nikala to gaya